Psa 21 | TUCT | STEP | Mbouŋ to David O Yoova, kinik tsiei loolo poia kat. Pasaa, yo upaloti pa taum tapirim. Yo uule pa malmal le iliiv koiŋa. Tauta tintini kat.

aMbo 2:1; Mk 14:1

Psalms 21

Yes Israela tipait Maaron pa uleeŋ tau i igham pa kinik toozi

Mbouŋ to David

1 O Yoova, kinik tsiei loolo poia kat. Pasaa, yo upaloti pa taum tapirim.
Yo uule pa malmal le iliiv koiŋa. Tauta tintini kat.

2 Gabua tau i loolo pani ve ighason ghom pani na, yo uŋguruuta mako.
Yo ugham pani wa.

3 Yo ula uvot tooni, ve upakuru pa gabua popoia naol.
Ve ughur moghar ndamoonda milmilia izala daaba.
Moghar tawe, tigharaata pa gol tau poia kat.

4 I ighason ghom to uŋgini poi ila saawe to malmal,
leso imaat sov, ve ileep poia taghon taghon gha ila.
Ve yo ulooŋ suŋuuŋ tooni.

5 Yo uule gha iliiv malmal, tauta eeza ivot imin tiina.
Ve upaboode pa tapirim ve poia tsio. Tauta vaaru ilaan irau nugh nugh, ve tamtamon tipaiti tighe i eeza tiina kat.

6 Onoon kat, poia tsio pale izazaa tooni taghon taghon gha ila.
Ve yo uleep tomania. Tauta loolo poia le poia kat.

7 Kinik tsiei inumeer Yoova. Tauvene gabua eta irau ighamu itap ne mako.
Pasaa, Maaron Tiina Tau Iliiv Zimaronŋa Tisov na, loolo isaghavu ariaaŋ, ve iuluule itaghon saveeŋ mbuaaŋ tooni.
8 O kinik, nimam pale ikisiir koiamŋa tisov.
Yes tau tighur koi payo na, nimam tapir pale isaghav zi.

9 Saawe tau utotoi tapirim ivot ighazooŋ, yo pale uvaghamun zi kat imin yav tiina ighan gabua.
Onoon kat, aatyavyav to Yoova pale izaa toozi, ve yav tooni ighaniir zi.

10 Natuzŋa paam, yo pale uravuur zi, ve upasov zi pa taan.
Tauvene murei, paaghu toozi eta irau ileep muul mako.

11 Onoon, yes tiil eez payo, ve timbu saveeŋ tighe tivaghamun ghom.
Eemon ŋgar toozi saghati tawe irau ighur anooŋa mako. ^a

12 Saawe tau tighita yo ughur paneegh naatu iŋarui zi,
yes pale tiroi ve tighau tila.
13 Yoova, uburig ve utotoi tapirim ivot ighazooŋ.
Leso nimbou ve nipait ezam pa tapirim.